Mae’n werth chweil cerdded Llwybr yr Arfordir o gwmpas Pen Dinas er mwyn gweld Parc Cenedlaethol Arfordir Penfro ar ei orau. Gall y llwybr fod yn waith caled yma, gan fod Pen Dinas 142 metr neu 465 troedfedd uwchlaw lefel y môr, ond mae’r golygfeydd yn wefreiddiol. Mae’n hyfryd dilyn y llwybr i gyfeiriad clocwedd i lawr am Gwm-yr-Eglwys, a mwynhau’r golygfeydd ardderchog tuag at Drefdraeth.

Y stribed o dir isel rhwng Pwllgwaelod a Chwm-yr-Eglwys yw’r cyfan sy’n cysylltu ‘ynys’ Dinas, sy’n eiddo i’r Ymddiriedolaeth Genedlaethol, â’r tir mawr. Mae llwybr troed llydan sy’n hygyrch i gadeiriau olwyn a chadeiriau gwthio, yn cysylltu’r ddau gildraeth sydd mor wahanol i’w gilydd.

Traeth tywodlyd yw traeth Cwm-yr-Eglwys gan mwyaf, a digonedd o byllau glan môr i’w harchwilio a chreigiau i’w dringo. Hefyd mae’n wynebu’r dwyrain, sy’n ei wneud yn fan cysgodol i nofio os yw’r gwynt yn chwythu o’r de-orllewin neu os oes tonnau mawr.

Y tu ôl i draeth Pwllgwaelod mae bwyty’r Old Sailor sy’n gweini bwyd môr a chwrw go iawn. Daeth Dylan Thomas i’r dafarn hon unwaith neu ddwy o leiaf! Mae dwy dafarn yn Ninas, sef y Freemasons Arms a’r Ship Aground, siop fechan a gorsaf betrol.

Does yr un gwesty yn Ninas. Byddai’n rhaid i chi fynd i Abergwaun i gael gwesty. Mae ychydig o leoedd gwely a brecwast, neu dai llety yn Ninas a’r cylch. Mae ambell i wersyll a maes carafanau teithiol, ac ychydig o safleoedd lle gallwch logi carafán statig, hunanarlwyo hefyd. Mae llawer o fythynnod hunanarlwyo ledled y rhan hon o Arfordir Sir Benfro.