Ym mhob tymor, ac ym mhob tywydd, mae tirwedd hudolus Trefdraeth yn siŵr o’ch swyno.

Dyma ardal boblogaidd gydag artistiaid sy’n cynnig siopau bwyd cyflawn, celf gydweithredol, caffis stryd a rhai o’r bwytai gorau yn Sir Benfro.

Diwrnodau llawn dop.

Ewch i gaffi Blas yn Fronlas neu gaffi PWNC i gael brecwast cyn crwydro o gwmpas y dref. Cofiwch ymweld â chanolfan Carningli a Chydweithfa Trefdraeth – cydweithfa sy’n arddangos gwaith amrywiol artistiaid y fro.

Mae Trefdraeth yn un o’r ychydig leoedd y gallwch chi gerdded o’r môr i gopa, a hynny mewn bore hamddenol. Carningli yw’r mynydd uwchlaw’r dref a bydd pobl leol o bob oed yn ei ddringo’n aml, drwy gydol y flwyddyn – felly ewch amdani!

Efallai y byddwch awydd cinio ar y copa, felly cyn gadael, ewch i brynu picnic organig o fara, caws a salad lleol yn y siop bwydydd cyflawn.

Yn y prynhawn, gallwch ddal i gerdded, y tro hwn o’r Parrog i Draeth Mawr Trefdraeth, o gwmpas y foryd; cofiwch alw yn Seaglass Bistro yng nghlwb golff Trefdraeth am baned a chacen, a golygfeydd ysblennydd, cyn cerdded am adref.

Gyda’r nos, mae digon o ddewis ardderchog ar gyfer eich swper. Mae gwesty a bwyty gwobredig Llys Meddyg yn cynnig prydau o’r bwyd lleol gorau sydd ar gael yn yr ardal.

Os hoffech rywbeth llai ffurfiol, cewch bitsa hyfryd yn y Canteen. Mae dwy dafarn hefyd, y Castell sy’n cynnig bwyd tafarn da a’r Royal Oak sydd â dewis gwych o gyri.

Mae bwyd rhagorol i’w gael ym mwyty tafarn y Golden Lion, ac mae Tides Kitchen & Wine Bar yn arbenigo mewn bwyd môr a chynhwysion lleol, a nosweithiau ’sgod a swigod bob nos Iau.

Mae trigolion Trefdraeth wrth eu bodd gyda pharti, felly cofiwch holi am ddigwyddiadau yn y Neuadd Goffa, gigs gardd yn Llys Meddyg neu gerddoriaeth fyw yn y Golden Lion. Ychydig i’r de mae Abergwaun, lle mae sinema theatr gymunedol a cherddoriaeth Geltaidd yn y lle poblogaidd diweddaraf, sef y Ffwrn.

Os ydych yma am dipyn o amser.

Gallwch gerdded i bedwar gwahanol gyfeiriad o Drefdraeth, heb orfod dychwelyd yr un ffordd.

Mae Llwybr Arfordir Sir Benfro yn mynd drwy’r Parrog yn Nhrefdraeth gan gynnig dwy daith gerdded drawiadol, o Abergwaun ac o Draeth Poppit. Cofiwch neidio ar fws Roced Poppit – bydd reid allan o’r dref, i’r naill gyfeiriad neu’r llall yn golygu y gallwch gerdded yn hamddenol yn ôl i Drefdraeth gan fwynhau golygfeydd rhyfeddol llwybr yr arfordir ar y ffordd.

Os yw dringo Carningli wedi codi awydd arnoch chi am gerdded mwy, mentrwch ymhellach i Fynyddoedd y Preseli am ragor o gopaon a golygfeydd di-ben-draw cyn belled ag Iwerddon a Gogledd Cymru.

Mae mwy o antur yn eich disgwyl yn harddwch Cwm Gwaun. Yma mae dau ficrofragdy, gwneuthurwyr canhwyllau, gerddi Penlan Uchaf a rhai o’r coetiroedd hynaf yng Nghymru, heb sôn am y Dyffryn Arms – neu ‘Dafarn Bessie’ i’r bobl leol. Dyma un o’r profiadau mwyaf rhyfeddol a gewch chi mewn tafarn yn Sir Benfro.

Gwlad y ceffylau gwyllt yw Tir Comin Carningli, ac ar gefn ceffyl yw’r ffordd orau o fwynhau’r dirwedd hon. Mae nifer o stablau marchogaeth lleol yn cynnig teithiau allan i’r waun ac i Gwm Gwaun – profiad bythgofiadwy.

Mae’n werth aros tan fore Llun pan fydd Stryd y Farchnad yn cau i draffig ac yn troi’n farchnad gynnyrch fywiog. Gallwch ddisgwyl cerddoriaeth fyw, byrddau caffi ar y stryd ac awyrgylch marchnad cofiadwy.

I’r rhai ohonoch sy’n hoff o chwedlau.

Mae Sir Benfro’n fyw o chwedlau ac os mai hanes sy’n mynd â’ch bryd, byddwch wrth eich bodd yng Nghastell Henllys. Dewch i ddarganfod y Celtiaid yn y gaer fyw hon o’r Oes Haearn, a dysgu rhagor am y dirwedd hynafol yma.

Ar eich ffordd yn ôl, ewch i siambr gladdu neolithig Pentre Ifan a choedwig dderw hynafol Tŷ Canol, ychydig i’r dwyrain o Drefdraeth. Dyma dir y chwedlau a’r straeon tylwyth teg llawn hud a lledrith – lle perffaith i danio’r dychymyg!

 Ac i’r rhai sy’n hoff o ramant.

Os am ramant, ewch i Lys Meddyg sy’n adnabyddus am ei ystafelloedd hardd a’i fwyty moethus.

Ac i’r llysieuwyr yn eich plith, y Cnapan yw’r lle am bryd yr un mor flasus.

Fore Sul, mae’n werth gwneud y daith fer i Abergwaun i gael crempogau ganol bore yn Ffwrn. A beth am dreulio gweddill y dydd yn ymweld â gardd Dyffryn Ffernant, crwydro llwybrau Cwm Gwaun a mwynhau’r golygfeydd o Fynyddoedd y Preseli ar y ffordd yn ôl.

Trefnwch eich dihangfa berffaith heddiw.

Darllenwch am ragor o drefi Sir Benfro yn ein cyfres ’48 awr yn…’.  Arberth, Penfro, Tyddewi, Abergwaun neu Ddinbych-y-pysgod – mae digon i’ch ysbrydoli.